恒指今日繼續上升，開市唔夠半個鐘曾高見19687，之後縮番少少，落到19574就企穩番。不過要注意，約19680係舊年1月以嚟最大跌浪嘅61.8%反彈位，恒指隨時見咗短期頂部。博客睇淡短期恒指走勢，第一當然係個61.8%費波納奇反彈幅度，第二係9RSI喺日線同周線分別高見86同78，明顯已經嚴重超買，第三係之前嘅熊證重貨區雖被攻陷，但現時恒指喺19700至20999形成重熊密集區，似乎唔係咁易攻破，最後，仲有八個交易日就係期指結算，好友係咪咁有信心一舉攻破兩萬？唔知。
如果你話今轉恒指係由外資流入推高，或者啦，但如果你話係因為聯儲局減息預期升溫，咁我就唔同意喇。近期聯儲局官員對利率前景嘅睇法好極端－有啲話減息可能性仍然存在，但有啲又話可能會加息，同埋預期6月12號晚議息會後都會按兵不動，仲有就係美國經濟數據表現反覆。不過，市場從來都係唔理性嘅，就算我認為短期應該會調整，但佢唔跌我都冇符，但調整風險已經大增，揸咗貨嘅都要綁好安全帶！
今日國際金價再創歷史新高，現貨金價升到每盎司2440.59美金，現貨銀價都升到每盎司32.51美金，創2012年12月以來最高。所以今朝隻紫金(02899)最多升7.3%，高見20.1銀，執筆時回番去19.5銀樓下，仲升緊4%。我唔係睇淡金價，但紫金技術走勢同樣已經嚴重超買，日線同周線圖9RSI分別升到84同81，月線9RSI都升到79，幾乎可以肯定大調整即將出現！我相信到時18銀都頂唔住，起碼要跌到16.5銀附近先有支持，總之呢啲位就唔應該高追啦！
睇好金價本應直接買SPDR金ETF(02840)，但紫金升幅超過SPDR，相信係因為除咗金升之外，期銅都創咗新高，但都係嗰句－世上唔會有只升價而唔會跌價嘅嘢，就算聯儲局減息，都唔應該會低過通脹率，如果美金利率長期企喺3.5至4厘，你估整體經濟會唔會受壓呢？紫金如果收低過條10周線(現時大約係17.4銀)，好友就應該離場先！
《編者按》本欄搜羅即市傳聞，惟消息未經證實，《經濟通》亦不保證內容之準確性。
《說說心理話》與你分享應對性騷擾三部曲，減輕心理陰影創傷、提升自我肯定方法 ► 即睇
38,686.32
16,735.02
